ايفان الدراجي
بالحلم، انا ويه مجموعة ناس ما اعرفهم ابيت ونحاول نقفل بابه حتى لا الناس الي بالحديقة يدخلون، ليش؟ يقولون لان رح نتمرض ونموت.. وطبعا اختاروني حتى الزم الباب وامنعهم.
جان اكو حصان ابيض يجنن بره بالحديقة بس جان يطفر ويركض عبالك مجنون او مهتاج، والناس ملتمة ع الباب تخاف منه تريد تدخل.
انكسر خاطري وقلت خل ادخلهم، ففتحت الباب ع السريع شوي وظليت احسب للسبعة ودخلت مجموعة منهم واحد ورا واحد وسديته. بس بالمرة الثانية فتحت الباب وجان اكو مره واقفة تبتسم وما قبلت تدخل.. شويه والناس بره بطلت تخاف وظلوا يلعبون ويه الحصان وسووا باربكيو!
باستثناء شخص واحد واقف يتوسل يريد يدخل بس شكله مو مريح ومظهره مو مرتب ما ردت ادخله لوما وحده قالتلي هذا عالم بيولوجي ممكن يفيدنا.
اشو فتحت الباب ودخلته للبيت منا وهذا هجم ع الناس منا. طلع زومبي وعضاهم كلهم وحولهم لزومبيات! ركضت طلعت بره وقفلت الباب عليهم. تذكرت شخص عزيز عليه نايم بالغرفة الي يم هذا البيت فديزتلها مسج حتى تكعد تشرد لان جانت نايمه. تذكرت بعدين هاي الغرفة بيها بابين باب ع الحديقة والثاني ع البيت، خفت لا يرحون الزومبيات يدخلون عليها لان مفتوح الباب. ركضت عليها وكعدتها وفعلا لكيتهم يردون يدخلون للغرفة. حاولت اقفله بس الحظ الاغبر طلع ما بيه قفل. فجأة اجت بنيه مخليه صبغ اظافر اخضر -لا تتعجبون هو بالحلم هيجي- تبرعت تلزم الباب لحد ما نشرد. البنية ذوبت اصابع رجليها بالارض ولزمت الباب. جان اكو طفل هم بالغرفه اخذناه وطلعنا وقفلنا الباب ورانا.
كعدنا بالحديقة بره نتفرج ع البنية خطية شلون ياكلوها الزومبيات. ضجت من الي صار ودرت وجهي ع الشارع جان اشوف احصنة بيض لابسة ملابس، جينزات وفساتين ونظارات وتمشي ع رجلين ثنين بكل مكان! حظي هاي مو احصنة هاي الناس كلها هيجي تحولت. زين معقولة كل الناس ع الكرة الارضية تحولت احصنة؟ معقولة اذا ننزل للشارع رح نتحول مثلهم؟
وانا بغمرة تفكيري اجت مجموعة ناس سمر يمشون عبالك مسيرة، فرحنا كلش ورحنا نركض عليهم حضناهم هم تعجبوا من تصرفنا. وجان يدق المنبه الصبح.
No comments:
Post a Comment