الفرق بين الصفر العربي والصفر الاجنبي - الناس والعادات

ايفان الدراجي

قبل لا نبدي نحجي عن الناس خلونا نفهم شي، يأما تسمي كل الناس الي عايشة بكندا كنديين او لا، ليش؟

يعتمد ع تعريفك للكلمة، ماكو شي اسمه كندي مولود اب عن جد الا السكان الاصليين، باقي الناس كلها الي عايشة هنا هيه مهاجرة.. سواء هسه او قبل 10 سنين او 100 سنة. عمر الدولة الكندية 150 سنة من يوم تأسست، بداية بدخول الانجليز والفرنسيين والي تلتها الهجرة الي حصلت من اسيا الشرقية ومن كل اوربا، اللي هاجر سبب الحرب العالمية والي هاجر لاسباب اخرى. وهيجي بدت الناس الاجيال بكندا. بكندا ميحبون كلمة مهاجر، لان يعرفون انو كل الناس حواليك هم مهاجرين او ابائهم اجو مهاجرين وبعدين اولادهم انولدوا بكندا. السكان الاصليين جدا قليلين وأغلبهم عايشين بمدن خاصة بيهم لاسباب اما سياسية او الها علاقة بعادات واسلوب حياتهم مراح اخوض بيها هنا.

هسه اتفقنا انو كلنا مهاجرين بس كنديين، بمجرد ما تدخل البلد باقامة مهما كان نوعها خلاص انت كندي ويمشي عليك القانون والك حقوق حالك حال غيرك.

تورونتو، اكثر واكبر مدينة باونتاريو بيها مهاجرين، 6 مليون شخص تقريبا الي عايش بيها، لانها تتميز بكثرة فرص العمل وهذا اهم سبب لاجتذاب الناس الها.

كل هذول المهاجرين = الكنديين ناس حبابة وكيوت وفريندلي ع رغم اختلاف ثقافاتهم وخلفياتهم العقائدية واسلوب حياتهم. بس محد اله علاقة بالثاني، مو معناها محد يحجي ويه اللاخ، لا قصدي محد يحكم عليك او يحاسبك ع شنو انت، ذكر او انثى، سترايت او مثلي او متحول جنسيا ابيض او اسمر او اشقر. محد يحاسبك شنو تاكل او ليش هيجي تلبس. من تمشي بالشارع تسمع مختلف اللغات واللهجات. ميفرضون عليك لغة او لكنة ما.

كلمن بحاله، ميدّخلون ولا يأذون احد. ما يخافون من المختلف ويحاربونه او يهددون بقتله مثل بلدان الشرق الاوسط. تحس نفسك عايش بوسط عالم مصغر بس متجانس ومتفق ع انو كلنا هنا بشر ومن حقنا نكون ونعيش مثل ما نحب، المهم ما نخالف القانون وما نأذي الغير.

عنصرية ماكو، وهذا اهم شي على خلاف بعض الدول الاوربية وبعض مدن امريكا. شكد صارت شغلات وحوادث، الاعلام ما يوجه اصابع الاتهام لفئة ما كأن تكون مسلمة او اسيوية او اي شي. اعلام محايد، يتجنب العنصرية واثارة الفتن قدر الامكان.

تلقى مهرجانات سنوية تنظمها الدولة وتكون عامة حتى تحتفل بكل فئة، مثل يوم الفخر للمثليين، راس السنة الصينية، الكرسمس، اعياد المسلمين ورمضان، الهانوكا، مهرجانات للهنود والايرلنديين والسكان الاصليين، و الكاريبيين .. اضافة للفن والسينما والمسرح والرياضة وكل النشاطات والثقافات.

لحد يسألك من وين جان وشنو اصلك خاصة اذا ميعرفك، مو من اول حوار، محد يسأل ليش ما تلبس حجاب اذا انت عربي او ليش متصوم او ليش تاكل بورك او ليش تشرب كحول، محد يسأل انت عايش لوحدك لو جاي ويه عائلتك. كل هاي الاسئلة كنت انسألها ومن خلالها ينحكم عليه من جنت ازور اي بلد عربي .. حتى لو رايحة اشتري خبز، ابو المخبز ينطي نفسه الحق انو يتدخل بخصوصياتي ويحقق لا وينطيني رأيه هم مع نصيحة مجانية.

طبع الناس هنا تستحي، مو باردين ولا مغرورين، بس لان يخافون يضايقوك لان ميعرفون طبعك ولا تقاليدك.. كلمة سوري ع طرف لسانهم حتى لو انت الغلطان. يحترمون كبار السن جدا وموفريلهم الاولية بهواي امور.

تعلمت هنا عادات جديدة وصرت كيوت مثلهم، شاركت الاسيوي والافريقي والاوربي، المسيحي واليهودي، الصغير والچبير افراحهم واعيادهم واكلهم. مثلا، صرت احتفل بالكرسمس والثانكس كيفين والهانوكا مثل هواي ناس، مو لدواعي دينية، بس لانو هيه تقاليد حلوه نتجمع بيها ويه اصدقائنا وناكل ونكظي وقت حلو ويه عوائلهم.. وهلشي يقربك من الناس ويعلمك تحترمهم ع رغم كل الاختلافات العقائدية والفكرية.

رح احجي بشوية تفصيل بالبوست الجاي عن الاشياء الي جربناها سواء كونها جديدة او لان نكهة التجربة غير لانها بكندا.

*الصورة بالشتا بـ دنداس سكوير.

Share: