مراية وشباك وباب، تصحيح لفلسفتي عن الحب

ناس الي نلتقيهم بحياتنا او برحلة البحث عن حب ممكن ينقسمون الى ٣ اشكال مختلفة، رح انزل بوست عن كل واحد

١- المرايا

تلتقي بشخص ومباشرة تحس اكو اندماج وتواصل فكري كأنما تعرفه من زمان، او كأنما هو هذا الي تبحث عنه...تبلش براسك العاب ناريه وترقص بصدرك فراشات كلما تشوفه او تكلمه..صايرة معاكم؟

هلشي يصير لان من التقيت بهذا الانسان رجع جزء من نفسك الماضية او من طفولتك تجدد، رجعت عشت تجربة قديمة غالبا مرتبطة باهلك، احد الابوين او كلاهم، واذا كانت علاقتك بأبويك (احدهما او كلاهما) غير صحيّة فهذا الشخص للاسف مراح تكون سعيد وياه و رح ترجع تعيش نفس الالم الي عشته بتجربتك القديمة.

سابقا كانت فلسفتي عن الموضوع تختلف، كنت اقول انا شخص يحب التحديات ويحب يركض وره النار لان تشعل جواي شغف وانا ما اقدر اعيش بدون الهام وشغف ومغامرات ودراما، بس هذا دماغي يتلاعب بيه حتى يرجعني لنفس التجربة القديمة.

المدهش بالموضوع؛ كلما تعيش اكثر وتعرف ناس اكثر، رح تعرف نفسك اكثر، احيانا في ناس تشوش معرفتك وعلاقتك مع نفسك واحيانا في ناس تفتحلك صناديق ما كنت تقدر تفتحها او حتى ما تعرف انو هي موجودة.

٢-الشباك

لما تكون مريت بعلاقات غير ناجحة بحياتك، علاقات مؤلمة او حتى سامة، رح تبدي تبني دفاعات قوية حول نفسك ومشاعرك وافكارك، ضروري بهاي المرحلة انو تشتغل على انو تتحرر بشكل او بآخر من دراما وصدمات الطفولة الي ما زالت ترافقك ويه شركاء حياتك بالكبر او بتعاملك مع الآخرين بالمجمل...لان اذا ما (تعالجت) من كل هاي ال childhood trauma ..الشخص التالي الي رح تلتقي بيه هو مهرب، هو عكس تماما لما عرفته سابقا، وع الاغلب مو هو الشي الي تريدة وانما الي تتصور انك تريده بس لان عكس الشخص الي سببلك ألم..رح تصنع براسك بهاي الفترة قائمة بمواصفات هذا الشخص، كلشي بيها جديد وغير مألوف، وتقنع نفسك انو هاي العلاقة رح تكون فرصتها اكبر واكثر نجاح بس لانه هلشخص جديد.

مو غلط نمر بهاي المرحلة لانها جزء مهم من رحلة العلاج، بس لازم تاخذ كلشي بهدوء وتنطيه وقته حتى لا تكون حياتك مجرد قفزة الم او غضب من عالم الى عالم، من عالم مألوف الى عالم مجهول..هلشي هم رح ينطيك نوع من النشوة والشغف، عيشهن، بس لا تتخذ قرار مصيري ممكن يأذي هلشخص او يخليك تعيس مجددا بس بشكل مختلف.

٣-الباب

هو الشخص الي رح ياخذك من ايدك للحياة الي تريدها، بس لما تعرف انت شنو تريد وشنو الي رح يخليك سعيد.

بالنهاية، مو دائما الشخص الي يخلي قلبنا يدق مثل طبول افريقية غاضبه هو الصح وهو السعادة، بالعكس، لما قلبك يكون نايم وهادي مثل عصفور يكرر اغنيته كل صبح لدرجة الملل...هو السعادة.

جزء من هذا الكلام كان حوار لطيف مع صديقة عمري العتيقة 💖

Share: