أنواع الذكاء حسب نظرية هاوارد جارنر وعلاقتها بحواس الانسان

اعداد وكتابة: ايفان الدراجي

بهذا الموضوع، رح أطبق طريقة النظر للأمور وتفسيرها من عدة زوايا، مو مثل ما تعودنا ومتعودين يا ابيض يا اسود!

دائما نسمع فلان ذكي وفلان غبي، فلان شاطر بالمدرسة وفلان رسب بدروسه، وبهواي مناسبات نسمع انو فلان ما كمل دراسة بس نجح بحياته والتفسير الغالب هو "الحياة احسن مدرسة" او "ابن سوق شاطر"، لان تبويبنا للذكاء او مدى نجاح الانسان منحسر بـ (ذكي) او (غبي)، بـ (ناجح بالمدرسة) او (راسب بالمدرسة). محاور جدا محدودة وعجزت عن تفسير نجاح ناس كثير رغم عدم تفوقها الدراسي وفشل ناس كثير بحياتها رغم انهم حملة شهادات عليا.

عام 1983 العالم النفسي هاوارد جارنر أسس نظرية ما زالت دارجة ومتداولة بالأوساط العلمية هي ان الذكاء اله 9 أنواع وليس نوع واحد فقط، وهلشي وصل اله من خلال دراسته لعدة اشخاص وملاحظته لتميزهم بمجالات دون أخرى. بهذا الموضوع مراح اشرح بس أنواع الذكاء حسب نظرية هاوارد مثل باقي المواضيع المتداولة على الانترنت، رح أضيف الها فلسفة ورأي شخصي من خلال ربط أنواع الذكاء بحواس الانسان وكيفية توظيفها، فبعضها تتطلب قوة ووجود حواس محددة حتى تتواجد عند الانسان وبعضها ممكن تتوفر بوجود بعض الحواس فقط. كل أنواع الذكاء هيه وليدة حاجة وتطور، تطورت مع الانسان ومهاراته لغرض التأقلم مع المحيط والنجاة من بدايات وجود الانسان القديم.

من تقره الموضوع اريدك تقول شنو نوع الذكاء الي ملاحظة عندك سواء اله علاقة بمهنتك او لا... نجي نعدد:

أولا: الذكاء المنطقي او الرياضي (Logical-Mathematical Intelligence)

موجود عند الناس المولعة بالأرقام والتحليل وحل المشكلات الي بيها حسابات ومعادلات علمية وتبدع بيها، يحبون الألعاب الاستراتيجية والألغاز الرياضية واي شي بيه سبب ونتيجة، ناس سعادتها بتحويل كلشي الى لغة الأرقام، مثل علماء الرياضات، مبرمجي الكومبيوتر، الفيزيائيين، المهندسين والمحاسبين. يمكن أشهر شخصيه ممكن اضرب بيها المثل هو شخصية شيلدون بطل المسلسل التلفزيوني المشهور (نظرية الانفجار الكبير big bang theory). هذا الذكاء يحتاج من الشخص ان يوظف حاسة واحدة للاتصال بالمعطيات الي يشتغل عليها ذكائه مثل النظر او السمع او أغلبهن اذا مو كلهن، بس يكون متلقي اكثر منه معطي.

ثانيا: الذكاء اللغوي (Linguistic Intelligence)

موجود عند الأشخاص الي عدهم قدرة اللعب بالكلمات والمفردات وتوظيفها لصالحهم، هم أحسن ناس ممكن يختارون المصطلحات والمفردات الصحيحة الي توصل الرسالة المطلوبة سواء كانت مباشرة او مبطنه للمتلقي، وهواي حكومات توظف ناس خاصة بهاي المهارات حتى تكتب الهم البيانات والخطابات العامة والسرية، وهواي شركات عدهم اقسام إعلامية خاصة توظف بيها هيجي ناس، ممكن نشمل تحت هاي القائمة الصحفيين الكتاب، الشعراء والمحامين أيضا. علاقة هذا الذكاء بالحواس اعتبرها توازن بين التلقي والعطاء، لذلك هو يحتاج يستخدم اغلب حواسه ويوظفها حتى ينجز أي مهمة.

ثالثا: الذكاء الحركي والعضلي (Bodily-Kinesthetic Intelligence)

الي يملكون هذا الذكاء هم الناس الأكثر سيطرة على عضلات جسمهم وتحركاتها وتوظيفها لإداء مهام معينة، مهارات فريدة بالحركة وحساسة بنفس الوقت مع قوة تحمل رهيبة، شايف أحيانا من يوقع شي قريب عليك اذا ارتبكت وما لزمته يعني ما عندك هاي البديهية العضلية واذا جسمك لا ارادي سوا حركة تتفاعل لإنقاذ الموقف يعني عندك هذا الذكاء. غريزة البقاء والنجاة يمكن اول محفز لهذا الذكاء عند الانسان منذ القدم ومن امثلتها ركوب الخيل والصيد واستخدام السيف او الأدوات القتالية القديمة. مع تطور العالم ما ظلت تقتصر على هاي المجالات، ابسط مثال الجراحين، الحرفيين، النحاتين والراقصين. مراح تحتاج لكل حواسك حتى يكون تطور هذا الذكاء، بس رح تحتاج لقوة وتركيز عضلي على الاغلب، وهو شخص معطي اكثر مما هو متلقي.

رابعا: الذكاء الموسيقي (Musical Intelligence)

نسميه غالبا بـ (الحس الموسيقي)، الشخص الي يعرف ويميز طبقات الأصوات وجماليتها من نشازها، الي ممكن يطور لحن او يتذوق الموسيقى بشكل مختلف عن باقي الناس والي على الاغلب يعتمد على حاسة السمع طبعا، عنده توازن بين التلقي والعطاء او تلقي فقط، مو بالضروري يكون موسيقي او مؤلف موسيقي، ممكن ببساطة يكون مستمع فقط، كان يكون مغني او مؤدي او مدرس حتى.

خامسا: الذكاء البصري (Visual-Spatial Intelligence)

مثل ما اكو ناس عدها حس عالي بالموسيقى، اكو ناس عدها حس عالي بالصور والألوان والتصميم، ممكن من نظرة يكّون تصميم ثلاثي الابعاد بدماغه للشيء بحيث يقدر يطوره او يحسنه ببساطة او يطلع الغلط الي بيه، واكيد هلشي يعتمد على حاسة البصر بالأساس، هلاشخاص يكونون جيدين باستخدام الخريطة وحفظ الأماكن وممكن نقول عدهم ذاكرة صورية للأشياء الملموسة، الأمثلة جدا بديهية كالرسامين ومصممي الكرافيك والديكور والمهندسين المعنيين بالتصميم اكثر منها حسابات. شخص ينطيك جمالية ويطرحها بأبسط الطرق الممكنة او اكثرها تعقيدا، على الأقل بالنسبة النا. ارشح انو تتطلع على اعمال الفنان الكوري (Kim Jung Gi) اعماله جدا دقيقة وكثيرة التفاصيل، مبهرة جدا.

سادسا: الذكاء الاجتماعي او الوجداني (Interpersonal Intelligence)

شخص يقرأ الناس مثل الكتاب ويفهمهم ويعرف شلون يتعامل وياهم، شخص يبني جسور وطيده مع الاخرين وصداقات ويكون على الاغلب محبوب ومريح لان ما يتحدد بطريقة وحدة بتعامله مع الاخرين وانما يتعامل مع كل شخص على حدة بمفتاحه، هذا الشخص لازم يستخدم كل ادواته وحواسه حتى يقره الاخرين وبعدين يتواصل وياهم، متفوقين بقدرتهم على تحليل وتقييم عواطف ونوايا ودوافع الاخرين وممكن يتنبؤون بيها أيضا. عدنا بهاي القائمة الفلاسفة، علما النفس، المستشارين النفسيين والاجتماعيين الي يتشغلون بالمبيعات (التجار) والسياسيين. تتذكرون شخصية الحاج متولي تاجر القماش؟

سابعا: الذكاء الذاتي (Intrapersonal Intelligence)

هو الشخص الي يفهم نفسه. غريبة مو؟ ممكن شخص يقول ليش منو ميفهم نفسه وليش يعتبر هلشي ذكاء. فهم الذاتي معنى واسع ومعقد، لا يعني فقط انو تعرف نفسك كان تعرف شنو تحب تاكل وتلبس وبس، انو تتصالح وتتقبل ذاتك وتحبها، وهذا أساس نجاح علاقتك مع الاخرين أيضا، لأنك عرفت شنو تريد وعرفت قيمة نفسك، بحيث مراح تكون بعلاقة غلط او وظيفة تقلل من شانك او تخاف من تحقيق هدف او طموح لأنك مو متأكد من نجاحك وخايف حتى من المحاولة، صراحة اعرف هواي ناس وبكثرة عدها صراع مع ذاتها وتفتقر لهذا النوع من الذكاء. هلشخص يكون قوية ومستقل ومؤثر بالأخرين من خلال تواصله وياهم، هواي ناس تحب تقلده وتعتبره مثل يحتذى به او قدوة. مهما كان مجالك فانت شخص ناجح بتعبيرك عن ذاتك، كان تكون يوتيوبر، كاتب، فيلسوف او أي شخص مهنته تعتمد على طرح أفكاره الشخصية ومناقشتها مع الاخرين من خلال نظرياته المطروحة.

ثامنا: الذكاء الطبيعي ( Naturalistic Intelligence)

الطبيعي هنا يعني بمعنى الطبيعة وليس المعاني اللغوية الأخرى الي ممكن تترجم من كلمات مثل normal، ترجمة المصطلحات للعربية أحس ما يوفيها حقها لذه كتبتها بالإنجليزي أيضا. مو كل الناس تفهم وتحب الطبيعة وعناصرها سواء حية او غير حية، هيه موهبة فريدة إنك تتواص مع الطبيعة والكون وتحبها وتحافظ عليها وتستغل مواردها، صراحة يكاد يكون علك بحد ذاته، خاصة التعامل مع النباتات والتربة والاحجار والمعادن، هواي اكو هواة يصرفون مبالغ كبيرة لاقتناء احجار، وناس تستثمر وقتها بالزراعة وعدها صبر على الاعتناء بيهن، واخرين يحبون الحيوانات بكل أنواعها، ممكن يكون اللمس من أكثر الحواس المستخدمة بهذا الذكاء. من ابسط الأمثلة علماء الجيولوجيا والحيوان والنبات، المزارعين ومربي الحيوانات او الي يشتغلون بأماكن بيها أنواع واسعة من الحيوانات مثل حديقة الحيوان والمحميات. من أشهر الشخصيات الي شفنا الها على نتفلكس برنامج وثائقي هو (Joe Exotic) الي كان يملك حديقة حيوانات فريدة بأمريكا واغلبها نمور وفهود وأسود الي كانت علاقته بيهن جدا قريبة ويعاملهم مثل حيوانات اليفة غير مفترسة!

تاسعا: الذكاء الوجودي او الحسي (Existential intelligence)

بعض الناس تسميه الأخلاقي أيضا، موجود عند الروحانيين مثل البوذيين، والمشككين على حد سواء، الناس الي تطرح أسئلة وجودية وتحاول تجاوبها بالبحث او التأمل، مثل شلون بدت الحياة؟ ليش انا موجود؟ شنو غرض وجودي بالحياة؟ هل تتناسخ الأرواح؟ هي هناك طاقة مرتبطة بالأشخاص؟ وغيرها من هاي الأسئلة. من الناس المميزين بيه هم الفلاسفة أيضا، الكتاب، المعالجين الروحيين وعلماء اللاهوت. اذا تؤمن بوجود حواس حسية أخرى فهؤلاء الأشخاص هم افضل مثال تطبيقي. من اشهر الشخصيات هو غوتاما بوذا الي أسس فلسفة ومدرسة حسية واخلاقية صارت اليوم من اكبر الأديان المتبعة بالعالم.

Share:

Read More

طبق حول العالم - المطبخ الألماني

مثل ما الالمان مشهورين بالبيرة، هم مشهورين بانهم يحبون اللحم لدرجة انو هو الطبق الرئيسي عدهم، وخاصة الپورك (لحم الخنزير).

وباقي الشغلات كلها يخللوها، حتى البيض مثل ما تشوف بالصورة. واشهر طبقين عدهم هو ال

Schweinshaxe (braised pork hock) يعني پورك مطبوخ ع البطيء

Saumagen (pork stomach) ومعدة الخنزير

لحد يقول يييخ، كلمن وذوقة، مثل ما اكو جماعة تاكل خفافيش وجماعة تاكل راس ورجلين ولسان ومخ الخروف، وناس مگظيتها عدس.. كلمن وذائقته.

المطبخ: ألماني

الاكلة: كتبت اساميهن فوق

المطعم: نسيت اسمه 😁

Share:

Read More

طبق حول العالم - kamayan feast

ما زايرة الفلبين بس سامعة انها من الدول الحلوة الي بيها جرز وسواحل، مال سياحة يعني

اكو مطعم حيل صغير وحيل مشهور والناس توقف عليه طوابير بالساعات بس حتى تعيش هاي التجربة من خلال احد الاكلات الفلبينية المشهورة، الصورة تشرح نفسها 😁

جربتها طبعا وكانت تجربة لطيفة بس مو مال كل يوم اكل هيجي!

الاكلة: kamayan feast

المطعم:Tinuno

المطبخ: فلبيني

Share:

Read More

طبق حول العالم - ميسو رامن الدجاج

تحت شعار من اختراعي: مو لان كل عراقي يحب الدولمة انت هم لازم تحبها، جرب كلشي!

جربت هنا كومة اكلات من مختلف الدول والثقافات، منها الي حبيتها ومنها لا

رح ابدي بالعشق 😍😍

الاكلة: ميسو رامن الدجاج

التصنيف: ياباني

المطعم: KINTON RAMEN

Share:

Read More

شلون تكسب ثقة رب العمل وشلون تطور نفسك بكندا؟

ايفان الدراجي

كندا مو جنة مثل ما متصور البعض، أي نعم هو بلد متطور وبيه قانون ويحترمون الانسان بس مو كل الي عايشين بيه ملائكة، تره ماكو واحد ميغلط، الكل يغلط والدولة الصح هي الي تعرف شلون تضبطها بالقانون بعدالة. هذا هو سر شعورك بالأمان بهاي البلدان لا اكثر ولا اقل.

هنا بكندا، الشغل عبارة عن سباق تنافسي، أحيانا شريف واحيانا لا.. طبيعي هلشي، طبيعي تلقى ناس تغار منك او تكرهك او تحاربك مثل ما تلقى ناس تساندك وتؤمن بيك وتوقف وياك..هاي خبزة، وبكندا الخبزة غالية! بس الي مراح تلقاه هنا، تهديدات قتل او عشاير او تحرشات جنسية او ناس تشوه سمعتك مثل ما جان يصير ببلدانا بالشرخ الاوسخ، للأسف لعبهم قذر جدا، وبكندا مهما كان الي وياك بالشغل كارهك او غيران منك ما ممكن ياذيك او يتطرف بردة فعله.

تعلمت من خلال مواقف صارت وياه ومن خلال منافسات غير شريفة من بعض زملائي بالعمل، انو العلاقات جدا مهمة، تحتاج ناس بمناصب عالية تعرفك وتثق بيك حتى توكف وياك، وهلشي يتحقق من تقدم لشخص خدمة وبالمقابل رح هو هم يقدملك خدمة. بيئة العمل بهواي شركات مو بس بشركتي تلعب السياسة بيها دور كبير، السياسة مو يعني أحزاب سياسية يعني كلمن وجماعته الي يدعمون قرار ما او تغيير ما. هنا الشركات دائمة التغيير بالضبط مثل ما نشوف بالأفلام، يبطلون ناس ويجيبون ناس، يسحبون منتج ويغيرون طريقة العمل وهكذا، لان السوق هيجي والشركة الذكية لازم تكون مرنة وقابلة للتغير حسب السوق والوقت حتى تظل تربح. هيجي بيئة عمل احبها، لان اني ملولة، ولاني اؤمن بالتغيير والتطور.. لهذا حبيت الشغل هنا وحبيت ابقه واتطور وياهم.. ومو بس هذا، أحيانا رح تغير مجال اختصاصك مثل ما صار وياي من خلال استغلال الي تعرفه وخبرتك حتى يخدم مجال ثاني.. لقيت نفسي انتقل من إدارة العقود والمشتريات لادارة العمليات والمشاريع لدرجة انو اني حاليا بديت ادرس بجامعة تورونتو حتى امتحن واحصل شهادة Project management ، صارلي بيها واهس وبلشت اشتغلها من فترة، بس الشهادة حلوة من تصير مذكورة بالريسومه هيجي كشخة.

اني اشتغل بشركة تسوي مشاريع بناء للدولة construction and infrastructure projects وبتورنتو هلشي ذهب، جرب ارفع راسك واحسب كل crane رح تشوف؟ مو اقل من ثنين، الكل يبني، من بنايات ناطحة للسحاب لمستشفيات ومدارس وطرق جديدة ومؤسسات ثانية، مثلا المشروع الي اشتغل بيه هو بناء خط مواصلات جديد الي يسموه المترو او السبواي ببعض الدول. تورنتو مدينة تتوسع وتكبر يوم بعد يوم وتوجه المستثمرين عليها قوي وداعم لكل هاي المشاريع من اليوم لبعد 10 سنين. من وصلت كندا جنت أقول اريد اشتغل بالنفط والغاز مثل ما جنت اشتغل بالعراق وجنت حابته حيل، بس هسه حبيت الكونستركشن اكثر لان اصعب وبيه تحديات وتغييرات دائمة وهماتين لان سوق النفط والغاز بكندا مو كلش قوي.

مره، اول مديرة هنا بكندا قالتلي شي بعدين فهمته، قالتلي تره كلمن يأدي شغله الي يأخذ عليه راتب، بس لازم الشخص ينطي اكثر حتى لو مستواه الوظيفي ما يسمحله او راتبه قليل لان لازم يخلي الشركة تعرف انو ما ممكن تستغني عنه، لازم تشوفين الشركة انو انتي دافعة راتبج من خلال شغلج ومن خلال الـ added value والي ممكن تكون أفكار تطورية او مساهمات ثانية. وهو فعلا هيجي، لازم تحسسهم انو ميكدرون بدونك والمفتاح لهلشي انو تشتغل بطريقتك انت مو الا تتبع طريقتهم، لا تخاف، ما دام رح تقدم نفس النتيجه او اكثر، اشتغل بطريقتك ولا تعلم احد. أي صح هاي انانية بس هذا ذكاء البقاء والتطور هنا بكندا او ع الأقل بمجال عملي.

تره الكنديين محتاجينك، انت وخبرتك واختلافاتك، لان هلشي يغنيهم، هم يردون أفكار جديدة وتجارب بلدان ثانية ممكن يطوروها ويستفادون منها، وشغله مهمة، اذا تلاحظ انو الي مولودين بكندا ودارسين بيها اغلب مجالات عملهم تعتمد على لسان وبداهة مثل المبيعات والموارد البشرية لان هذا الي فالحين بيه يحجون بطلاقة وبس، بينما العمل الصعب الي يحتاج اتخاذ قرارات وخبرة تقنية وعملية فهذا ع الي يجبوهم من بره، والي قلنا ببوست سابق ما نسميهم مهاجرين. كندا تحتاج ناس عدها خبرة واستعداد تقدم أفكار لهذا البلد وتخدمه، لعد ليش تتوقع فاتح بابها لكل العالم؟ وهنا تكمن فرصتك انو تشوفهم قيمتك وتكسب ثقتهم.

*الصورة: المنظر الي اشوفه من بنايتي

Share:

Read More

العمل في كندا وتطوير الذات

ايفان الدراجي

تسمع مختلف الآراء من تجي لكندا ومختلف النظريات، كلهن صح وكلهن غلط، شلون؟ لان كلمن وتجربته وظروفه ومعطياته، ما ممكن اخلي كل الناس الي توصل كندا تتبع خطوات احمد (مثلا) ورح تنجح مثله، مستحيل هلشي.. بعدين نقطة مهمة، كل شخص وقابليته ورغباته، اكو ناس وصلت وتريد تمشيها شلون ما كان وترتاح، واكو ناس تريد تتطور وتبني نفسها، بينما اكو ناس تريد تتونس وبس، وكلهم مو غلط.

رح تسمع الآتي:

أولا- اذا تريد تشتغل لازم تكون عندك خبرة كندية رغم انو هلشي ممنوع قانونيا بس هو الماشي ومحد يطلبه بالصريح، ماكو رب عمل من يسويلك مقابله يسألك كم سنة خبرة كندية عندك، بس رح يسألك شكد صارلك بكندا وشنو تاريخ شغلك ومن خلال جوابك رع يعرف انو ما عندك خبرة كندية.. شنو هيه الخبرة الكندية؟ بكل بساطة هيه انو تعرف شلون تتعامل ببيئة عمل يكونون زملائك من مختلف الجنسيات والخلفيات بحيث ما تنقدهم ولا تقلل من شأنهم ولا تسألهم أسئلة شخصية عن الدين والسياسة والميول الجنسية، هاي اهم نقطة. شغلات أخرى عن الخبرة الكندية وهي مثلا نظام الضرائب بصورة عامة، القوانين الفيديرالية وقانون كل مقاطعة، نظام الرواتب، قوانين بيئة العمل الامنة الي يسموها health and safety والي ينطوك بيها تدريب اول ما تبلش أي شغل مهما كان.

ثانيا- لازم تقبل باي وظيفه حتى تصير عندك خبرة كندية وتسوي شبكة علاقات وتتعلم شلون تتعامل ويه الزباين بلغة ولكنة البلد... كلنا تعلمنا إنكليزي بالمدارس والكليات ببلدانا، بس كل دولة لغتها الرئيسية هيه الإنكليزي اكو اختلاف باللهجة والمصطلحات والمختصرات المستخدمة.

ثالثا- لازم تدرس وتحصل شهادة كندية اضافه الى معادلة شهادتك اذا عندك.. المعروف بامريكا الشمالية انو ميعترفون 100% بالشهادات الي جايه من بعض الدول مثل الشرق الأوسط، لان يعرفون بكلاواتنا وشلون عدنا الرشوة تشتري كلشي. لهذا يفضلون انك تدرس من جديد عدهم وعلى ايدهم، بس هلشي مطلوب لمهن معينه مو كل المهن طبعا.

رابعا- لازم تنخرط بالعمل التطوعي (بدون راتب) حتى تكتسب خبرة كندية وتتعلم ع البلد واللغة وطباع الناس وبعض الشركات والحكومة يحبون يشوفون بالسيرة الذاتية مالتك اكو تطوع. اكو العكس، أحيانا وجود التطوع بالريسومه (السيرة الذاتيه) معناها انك جديد ع كندا وما حصلت شغل وهلشي رح يضرك ما يفيدك.

خامسا- لازم تدخل دورة تعلمك شلون تكتب الريسومه (السيرة الذاتية) بالطريقة الكندية الاحترافية.

اضافه لكل هذا تعلم الإنكليزي، اكو ناس تجي وهيه ضابطة اللغة واكو ناس لا تحتاج تدخل مدارس. الحكومة موفرة مدارس مجانية للأطفال والكبار لتعليم الإنكليزي والفرنسي لان هم اللغتين الرسميتين للبلد، بس انت مو ضروري تعرفهن ثنينهن يعتمد هلشي ع المقاطعة الي انت عايش بيها ووين تريد تشتغل. الفرنسي ضروري اذا تريد تشتغل بالحكومة الفيدرالية او اذا كنت عايش بمقاطعة كيبيك.

ممكن هذا كله يأخذ منك شهور او عدة سنوات حتى تحصله وتضبط اللغة، حسب كل شخص. وممكن مراح تحتاج اله ابد اذا ظليت عايش ضمن الكوميونيتي مالتك يعني بنص ناس تعرفهم من بلدك يحجون لغتك ويشتغلون شغل حر وتجارة وكذا. حتى لو تطكطك كم كلمة إنكليزي هم يمشي حالك.

اغلب هاي النقاط سويتهن باستثناء الدراسة وتعلم اللغة، لمدة تقريبا 3 شهور ووراها اكتشفت انو كلهن ميفيدني ولا رح يفيدني، والشغل الي حصلته ماله علاقة بيهن ابد، لاني مو انسانة سلبية مراح أقول ضيعت 3 شهور من حياتي رح أقول كانت تجربة حلوة و ع الأقل طلعتها من قلبي هههههه.

بعد 4 اشهر من وصولي لكندا حصلت عقد سنوي بنفس اختصاصي العقود والمشتريات، مع ان الراتب كان قليل لان المنصب كان اقل من منصبي بالعراق بس قلت ميخالف هاي بداية وزين منهم شغلوني رغم ميعرفوني ورغم ما عندي خبرة كندية وهلشي بصراحة نادرا ما يضبط.. مو سهل تثق بيك الشركة وتسلم شغلها اذا انت جديد، لهذا خلوني عقد حتى يجربوني واذا عجبتهم يثبتوني.. ماكو شهرين وحصل عقد ثاني بشركة اكبر وراتب اعلى بهواي! ليش؟ لان اني شكاكة وما مقتنعة بكل هاي الخطوات ولا مقتنعة انو لازم تصير عندك خبرة كندية ولازم تبدي من الصفر...طيب اوك بديت من الصفر بس ما اظل بيه سنين! شهرين كان اكثر من كافي حتى اطفر، وطفرت.

حصلت شغلة بالشركة الي اني لحد هسه وياهم من 4 سنين تقريبا، بديت بعقد هم حتى يجربوني وثبتوني بعد 8 اشهر ورقوني، وظليت وياهم كل سنة اترقى واني هم اتعلم واتطور وياهم، الشركة عرضت علي شغل بفانكوفر وبنيويورك قبل كم شهر قبل لا تصير سالفة الكورونا، بس لان اسسنا حياتنا هنا فـ مو وقتها ننقل ونلبش من جديد. المفتاح هو الثقة، بمجرد ما رب عملك او مديرك يثق بيك ويعرفك شاطر وتعرف شتريد خلاص، رح يجلبون بيك ورح تتطور وياهم.

شلون تكسب ثقة رب العمل وشلون تطور نفسك من خلال شغلك؟

*الصورة طالعة اتغدى ويه زميلاتي بمطعم فيتنامي

Share:

Read More

الفرق بين الصفر العربي والصفر الأجنبي – المهنة والمستقبل

ايفان الدراجي

المهنة هيه الـ career وهيه تختلف عن الشغل الي هو الـ job، المهنة هو شنو تريد تكون بالمستقبل وبأي طريق حابب تمشي وتتطور، اما الشغل فممكن يكون وقتي تمشي بيه حالك الى ان تكتشف شنو تريد تسوي. لهذا هذا البوست منفصل عن الي السابق الي حجيت بيه عن الشغل.

اني شخص ما يؤمن بالاصنام او المعابد المقدسة، مول لاني ملحدة، قبل لا اصير ملحدة، هيجي انولدت، عندي 1+1 ممكن يساوي شي ثاني مو 2. اني هيجي...تنطيني سؤال بيه خيارين اجاوبك اما بشي ثالث او بسؤال اخليك ترجع تعيد صيغة سؤالك الي. اني شخص لا يؤم بالقواعد والقوالب وعندي كلشي قابل للتغيير والتجديد، اكره الروتين والانظمة واحب التجربة والابداع. هلطبع والتفكير انولدت بيه، لا قريته بكتاب ولا احد رباني هيجي ولا تاثرت بشخص، انولدت بيه built in . اسأل هوايه بامور ما تخطر ع بال احد، جنت صغيرة يمكن 5 او 6 سنين، جان عدنا مكيف مثبت بالحايط وبيه عش عصافير مهجور من بره، طلع والدي ينظفه لان جان يدخل اوساخ وقش كلما نشغل المكيف، لقه بيه بيض مكسر: فاني هناك سألت والدي سؤال ماله علاقة بالبطيخه، قتله بابا شمدريهم الديناصور يبيض ما يجيب؟

كل الي كتبته وراح اكتبه مو تسويق لنفسي وانما حتى تفهم ليش تصرفت هيجي وليش وصلت للي وصلتله هسه.

جربت هواي أمور بحياتي، من مراهقتي وجان دائما حلمي انو أكون شي جبير، لان اعرف عندي طاقة وصبر وواهس اكمل بالشغلة الى ان اسويها. من جنت صغيرة جنت ارسم هواي لان هيه هوايه حبيتها ونميتها، وبديت بالرسم الجاد أيام جنت طالبة بالكلية، جنت اعرف هواي أساتذة فن، وجانوا يعارضون طريقة رسمي، جانوا يقولولي لارم تبدين بالبورترايت ومن تضبطينه تنتقلين للألوان والمناظر الطبيعية ومن تنضج شخصيتج الفنية يلا تكتشفين المدارس والأساليب الفنية. تدرون بشنو بلشت ارسم؟ تجريدي وتكعيبي ورمزي وسريالي، وبعدين وره كم سنة يلا بلشت بالبورترايت، بس بحياتي ما رسمت نخلة وبلم وصريفه مثل ما جانوا يطلبون مني.

هذا رابط لبعض لوحاتي للي عنده فضول يشوفهن

https://evanmurtadhaart.blogspot.com/2016/08/paintings.html

وهذا رابط للبورتاريتس الي رسمتهن

https://evanmurtadhaart.blogspot.com/2016/08/sketches.html

أتذكر اول معرض سويته جان سنة 2004 يعني وره السقوط بسنة، جنت بعدني طالبة بالكلية و جنت بوقتها لابسه حجاب -اجبارا طبعا- فنزلت صورتي بالجرايد ولوحاتي وراي وكاتبين جوه المقال معرض (الفنانة) ايفان الدراجي. والدي بوقتها اجاني مرتعب يركض، معترض ع لقب فنانة، قلي "بابا فنانة بمجتمعنا = كحبة، ترضين امشي بالشارع والناس تقول عني بنتك كحبة؟" هذا هو المجتمع وهيجي يفسر الفن. يعني بالـ2004 جانت الناس تنقتل ع الهوية والطائفية وبنات تنخطف وتغتصب لان ما لابسة حجاب وناس تنخطف علمود فلوس، وايفان مسويه معرض وكاتبين عنها فنانة، لا وجماله منزلين صورتها الحقيقية!

والدي وكل عائلتي محافظين وملتزمين بالدين حالهم حال هواي عوائل عراقية، يخافون من المجتمع وحجي الناس لان هم جزء منه. عندي 2 خوالي شيوعيين من سقط النظام رجعوا للعراق، هم شيوعيين أي ويؤمنون بالمساواة وحقوق المرأة بس بس بالشعارات والمقالات، صفر تطبيق بالواقع. اخذني مره واحد من خوالي لمقر الحزب يعرفني على مدير الجريدة هناك، اخذتله مقال الي حتى ينشره، كان المقال عن الطبقة البروليتارية وشنو حجمها وتاثيرها بالمجتمع العراقي. المدير بس قره العنوان قالي " لا.. انتي شلج بهاي السوالف، كتبي عن المرأة، عن الأزياء او الأبراج، عوفج من هاي السوالف تره محد يقراهن".

اني اقره كتب واحب اقره كلشي، فن وحب وسياسة واقتصاد ودين وفلسفة، كلشي. وهلشي ساعدني أكون أفكار واكتب واعبر عنهم بمقالات، هيجي بديت. بحياتي ما قلت لنفسي لاني بنية عايشة بهيجي مجتمع ولانو بعدني صغيرة اذن لازم اكتب عن كذا فقط لان هذا بس الي يناسبني والناس رح تتقبله مني. جنت انشر بالجرايد والمواقع عن طريق اني اراسلهم اونلاين واحيانا لاني اعرف فلان الي اعرف فلان الي وياي بالكلية وهكذا. من الرسم انتقل واهسي بالكتابة، وصار الموضوع عندي قضية حياة او موت، صار الموضوع بالنسبة الي انو لازم الكل يعرفني وانو لازم انشر كتب ولازم ولازم. المهم بدت كتاباتي تنتشر بهواي مواقع وجرايد لدرجة ظلوا الصحفيين والباحثين يسوون وياي مقابلات، والدي -مرة أخرى- مرة تعارك وياي وقالي " ترحين للمكتب تنشرين هاي السوالف بابا ذولة يقشمرون عليج بابا يردون يوكعوج" قتله بحياتي ما رحت لمكتب كله اونلاين او عن طريق الكلية وخلي شوية ثقة بيه اني مو غبية او مشايفه حتى يوكعوني ويقشمروني علمود مقال ينشرونه. هيه هاي المشكلة العويصة: عند الاهل البنات كلهن عبارة عن كس مكشوف وباقي العالم قضبان منتصبة منتظرة أي حركة غبية من البنية حتى تقشمرها. اوكي ما اعترض ع فكرة القضبان المنتصبة بس اني انسانة عندي فكر ورأي اريد اعبر عنه، اني لا لحمة تمشي بالشارع ولا كس مكشّف. وارفض احد يعاملني ع هلأساس. وهيجي بدت عندي شخصية ايفان الثورة الي تريد تغير المجتمع والعالم حولها.

انتقلت من مرحلة التعبير عن أفكار عشوائية الى الكتابة بهدف التغيير عن طريق النقد واثارة الأسئلة، ظليت انتقد المجتمع والدين والسياسة وتطوعت بعدة منظمات منها منظمة حرية المرأة وانخرطت بعدة حركات سياسية منها حركة ديمقراطيون الي بوقتها جنا نتبع كتاب يحجي عن تطبيق الديمقراطية وشلون بعض الدول الاوربية قدرت تغير أنظمتها من خلال اتباع هلكتاب، وظلينا نسوي اجتماعات ونحجي ويه ناس بره العراق حالمين انو رح ننتهز فرصة سقوط نظام صدام ونأسس بلد ديمقراطي حقيقي قبل لا تستولي عليه الميلشيات الدينية... هه بطرانين مو؟ بهلفترة هماتين، بلشت تحقيقات صحفية عن جرائم الشرف والعنف ضد المرأة والجرائم ضد المثليين وتعاملت من جهات اجنبية ومنظمات عالمية باعتباري مراسلتهم جوه العراق.

هلمرحلة من حياتي كلفتني هواي، تأذيت هواي وتعرضت لمواقف ومشاكل من اهلي وبالشارع ومن ناس اعرفها وما اعرفها اونلاين وحتى من زملائي بالعمل، أي العمل، لان اخذتلي سنين بهاي المرحلة مؤمنة بتغيير العالم والمجتمع واشتغلت ع هذا الهدف. اهلي بالبداية كانوا وياي ويشجعوني ارسم واكتب، لان جنت صغيرة وجانوا متصورين هاي هواية وفترة وتشبع وتمل، بس بدوا يصيرون ضدي ويمنعوني من شافوني جادة وعندي اهداف... هنا خافوا واتخذوا من الخوف مبرر لكل اعتراض ولكل مرة وقفوا بيها بطريقي حتى لو جنت انشر بوست بالفيس من خلال شاشة!

بس بعدين اكتشفت شغلة مهمة، جدا مهمة، انو اني ما جنت اريد اغير العالم والمجتمع، جنت اريد اغير حياتي اني وعالمي اني، واكتشفت انو هلشي مراح يتحقق عن طريق عمل سياسي او كتابة مقال او المشاركة بمهرجان او الانضمام لمنظمة او حركة ما.. هلشي تحقق من سويت اكشن حقيقي جريء وخطير، من قدمت تضحية حقيقية، من شلت جنطتي على ظهري وتركت كلشي وراي وبديت من الصفر بمكان يحترمني كإنسانة عدها أحلام وأفكار تريد تعبر عنهن. لهذا بطلت اكتب مثل قبل للي يسأل وهواي سألوني ليش بطلتي مو جنتي مُلهمة. الجهل كثيف ويتكاثر بسهولة وبسرعة، اذا تسّكت او تعلّم جاهل واحد يطلعلك ثاني يوم الف غيره وانت لوحدة وقلمك بهاي المعركة. جنت اصدق بالمثل الي يقول ( اللحاح يفك اللحيم)، هه..لحيم الشرق الأوسط اصلي وكلشي ما يفكه، لحيم متكون من قبل العصر الطباشيري ومتأصل بالجينات، ينولد الطفل وهو عنده شوارب شتترجي بعد؟ هامش: جبتها ع الشوارب عود هاي شغلة ذكورية..هاهاها.

من سافرت ووصلت لكندا، جان براسي هواي أحلام ممكن احققها بهلـفضاء الحر الإنساني. جنت اريد انشر كتاب عن قصة حياتي، جنت اريد اسوي قناة يوتيوب احجي بيها عن قصتي، جنتي اريد اسوي ورشة رسم وامتهن الفن، جنت اريد اكمل اخراج مسرحي لان جنت كلش احب المسرح، خل ارجع شوي ليوره كم سنة من جنت بالعراق، من الشغلات الي جان الي واهس بيهن، الفن المسرحي والسينمائي، اشتغلت ويه هواي ناس من ضمنهم صديقي العزيز محمد العامري، اشتغلنا أفلام قصيرة ومسرح وهواي من اعمالنا ترشحت بمهرجانات معروفة ومنها الي اخذت جوائز.

نرجع... من سافرت ووصلت لكندا، تغير كلشي كل تفكيري وكل خططي، وتغيرت اهتماماتي كليا، تعرفون ليش؟ تولدت براسي أسئلة تنتهي بعبارة (وبعدين) ، رسمت وبعدين؟ كتبت كتاب وبعدين (هامش اني ناشرة 4 كتب سابقا)؟ ماكو بعدين.. اني طلعت وحققت الي اريده فخليني استمتع بيه وكافي لطم وانتقادات لان هلمجتمع الي تركته مراح يتغير لو بعد مليون سنة ولا يهمني بعد يتغير، مثل ما عانيت يخليهم يعانون لان من ايدهم، يردون يغيرونه خلي هم يتغيرون بالأول. فقدت الاهتمام بكل القضايا الي جنت اؤمن بيها، من احتاجيت وجنت بأزمة لا فادتني منظمة ولا كاتب ولا جريدة ولا رسم ولا فيسبوك. الي فادني هو ايماني بالثورة والقوة الي بداخي. بس لازم اعرف هسه اني شنو اريد؟ شنو هو مستقبلي؟ وشنو اريد أسوي بحياتي. البزنز وتحديدا العقود والمناقصات، الجانب التجاري منها، صار واهسي الجديد.. ما اعرف يمكن بسبب تأثير الرأسمالية، او لا.. بصراحة بديت هذا الواهس من جنت بالعراق، مديرتي جانت إنكليزية وتعلمت منها هواي أمور، أتذكر اول مرة وره ما تخرجت اشتغلت على شوي ارقام بالاكسل شيت واني اكره الرياضات بسبب عقدنا المدرسية ومناهجنا العقيمة، فبعدني ما اعرف شي قلتلها لا تنطيني هيجي شغل اريد غيره لان اني اكره الأرقام، قالتلي لا بالعكس، اني متأكدة انتي تحبيهن ورح تبدعين بشغلج من خلالهن بيوم من الأيام... هيجي بلشت بكندا بنفس الشغلة الي جنت اعرفها بالعراق وتطورت من عدها الى شي ثاني رح احجي عنه مفصلا والمواقف الي تعرضت الهن واني اصعد السلم ببوست ثاني، هذا البوست صار كلش طويل.

*الصورة من حفل توقيع 2 من كتبي سنة 2014 واحد صدر عن دار الغاوون والثاني عن دار اكد.

Share:

Read More

الفرق بين الصفر العربي والصفر الاجنبي - الناس والعادات

ايفان الدراجي

قبل لا نبدي نحجي عن الناس خلونا نفهم شي، يأما تسمي كل الناس الي عايشة بكندا كنديين او لا، ليش؟

يعتمد ع تعريفك للكلمة، ماكو شي اسمه كندي مولود اب عن جد الا السكان الاصليين، باقي الناس كلها الي عايشة هنا هيه مهاجرة.. سواء هسه او قبل 10 سنين او 100 سنة. عمر الدولة الكندية 150 سنة من يوم تأسست، بداية بدخول الانجليز والفرنسيين والي تلتها الهجرة الي حصلت من اسيا الشرقية ومن كل اوربا، اللي هاجر سبب الحرب العالمية والي هاجر لاسباب اخرى. وهيجي بدت الناس الاجيال بكندا. بكندا ميحبون كلمة مهاجر، لان يعرفون انو كل الناس حواليك هم مهاجرين او ابائهم اجو مهاجرين وبعدين اولادهم انولدوا بكندا. السكان الاصليين جدا قليلين وأغلبهم عايشين بمدن خاصة بيهم لاسباب اما سياسية او الها علاقة بعادات واسلوب حياتهم مراح اخوض بيها هنا.

هسه اتفقنا انو كلنا مهاجرين بس كنديين، بمجرد ما تدخل البلد باقامة مهما كان نوعها خلاص انت كندي ويمشي عليك القانون والك حقوق حالك حال غيرك.

تورونتو، اكثر واكبر مدينة باونتاريو بيها مهاجرين، 6 مليون شخص تقريبا الي عايش بيها، لانها تتميز بكثرة فرص العمل وهذا اهم سبب لاجتذاب الناس الها.

كل هذول المهاجرين = الكنديين ناس حبابة وكيوت وفريندلي ع رغم اختلاف ثقافاتهم وخلفياتهم العقائدية واسلوب حياتهم. بس محد اله علاقة بالثاني، مو معناها محد يحجي ويه اللاخ، لا قصدي محد يحكم عليك او يحاسبك ع شنو انت، ذكر او انثى، سترايت او مثلي او متحول جنسيا ابيض او اسمر او اشقر. محد يحاسبك شنو تاكل او ليش هيجي تلبس. من تمشي بالشارع تسمع مختلف اللغات واللهجات. ميفرضون عليك لغة او لكنة ما.

كلمن بحاله، ميدّخلون ولا يأذون احد. ما يخافون من المختلف ويحاربونه او يهددون بقتله مثل بلدان الشرق الاوسط. تحس نفسك عايش بوسط عالم مصغر بس متجانس ومتفق ع انو كلنا هنا بشر ومن حقنا نكون ونعيش مثل ما نحب، المهم ما نخالف القانون وما نأذي الغير.

عنصرية ماكو، وهذا اهم شي على خلاف بعض الدول الاوربية وبعض مدن امريكا. شكد صارت شغلات وحوادث، الاعلام ما يوجه اصابع الاتهام لفئة ما كأن تكون مسلمة او اسيوية او اي شي. اعلام محايد، يتجنب العنصرية واثارة الفتن قدر الامكان.

تلقى مهرجانات سنوية تنظمها الدولة وتكون عامة حتى تحتفل بكل فئة، مثل يوم الفخر للمثليين، راس السنة الصينية، الكرسمس، اعياد المسلمين ورمضان، الهانوكا، مهرجانات للهنود والايرلنديين والسكان الاصليين، و الكاريبيين .. اضافة للفن والسينما والمسرح والرياضة وكل النشاطات والثقافات.

لحد يسألك من وين جان وشنو اصلك خاصة اذا ميعرفك، مو من اول حوار، محد يسأل ليش ما تلبس حجاب اذا انت عربي او ليش متصوم او ليش تاكل بورك او ليش تشرب كحول، محد يسأل انت عايش لوحدك لو جاي ويه عائلتك. كل هاي الاسئلة كنت انسألها ومن خلالها ينحكم عليه من جنت ازور اي بلد عربي .. حتى لو رايحة اشتري خبز، ابو المخبز ينطي نفسه الحق انو يتدخل بخصوصياتي ويحقق لا وينطيني رأيه هم مع نصيحة مجانية.

طبع الناس هنا تستحي، مو باردين ولا مغرورين، بس لان يخافون يضايقوك لان ميعرفون طبعك ولا تقاليدك.. كلمة سوري ع طرف لسانهم حتى لو انت الغلطان. يحترمون كبار السن جدا وموفريلهم الاولية بهواي امور.

تعلمت هنا عادات جديدة وصرت كيوت مثلهم، شاركت الاسيوي والافريقي والاوربي، المسيحي واليهودي، الصغير والچبير افراحهم واعيادهم واكلهم. مثلا، صرت احتفل بالكرسمس والثانكس كيفين والهانوكا مثل هواي ناس، مو لدواعي دينية، بس لانو هيه تقاليد حلوه نتجمع بيها ويه اصدقائنا وناكل ونكظي وقت حلو ويه عوائلهم.. وهلشي يقربك من الناس ويعلمك تحترمهم ع رغم كل الاختلافات العقائدية والفكرية.

رح احجي بشوية تفصيل بالبوست الجاي عن الاشياء الي جربناها سواء كونها جديدة او لان نكهة التجربة غير لانها بكندا.

*الصورة بالشتا بـ دنداس سكوير.

Share:

Read More

الفرق بين الصفر العربي والصفر الأجنبي – الشغل والضريبة

ايفان الدراجي

الشغل موضوع جدا شاسع، كل شخص حسب مقوماته، علاقاته، ذكائه ومدى تأقلمه ويه الوضع. احترم الانسان الي يشتغل مهما كانت وظيفته وهو أحسن من الي يتحججون وياخذون مساعدات تطلع من راتبي وتعبي. الدولة ما تنطي شي من جيبها كله منك الك. 

اكو مؤهلات كالشهادات الطبية والتقنية والهندسية والقانونية والي بمجالات حساسة رح تحتاج تسوي امتحان وتاخذ رخصة كندية، واذا ما اخذت الرخصة ما تقدر تشتغل بيهن، لهذا حملة هاي الشهادات يعانون بالبداية. بس هو شغل ذهب بصراحة! 

كندا بيها شغل هواي، وفرص هواي ومكن تسوي أي شي تريده واي شغله تشتغلها، يرحبون بيك وبخبراتك خاصة اذا تفتح بزنز خاص، هيه الصعوبة بس بالبداية، بس اذا خليت رجلك ع اول الطريق خلاص، رح تطير. 

المشكلة الوحيدة، ماكو ضمان انو رح تبقى بوظيفتك للأبد، ولا ممكن يخلوك بوظيفتك اذا انت مو عنصر منتج ويشوفون نتيجة، خاصة الشركات، اذا ما تقدم نتائج استثنائية بسهولة يستغنون عنك. ما يدفعون راتب ابلاش. لا حزب يفيدك ولا معارف ولا تكظيها تأخذ اجايز وتتهرب من الشغل، كندا ع كد ما تنطيها تنطيك. وكلمن وكفائته، سواء بشهاداته او بخبرته الطويلة او حتى بشخصيتك، هواي ناس هنا شفتها رواتبها خياليه بس لان عدها شخصية مميزة مثلا تخلي الشركة تربح صفقات كبيرة او تبيع منتجات باعداد كبيرة، هذول الناس يأما يكونون بمجال المبيعات او بمجال إدارة الاعمال، او بالمجال القانوني، تلقى كل الي يسوي هلشخص انو يحضر اجتماعات وتلفونات يمشي بيها الشغل. وهلشي يأكد كلامي، كلمن وكفائتة، ياما اكو ناس بالبلدان العربية اعرفهم ، مميزين واذكياء، فنانين ومبدعين بس للأسف أي فرصة او تقدير ما الهم الا ما ندر. ابسط شي ابسط شي هنا اذا الناس تحب شخصيتك كمدرب لياقه خاص رح تعيش احلى عيشه او اذا ترسم تاتو حلو تصير ملك. 

لو بطلت من شغلك لاي سبب، تقدم ع الدولة ينطوك شهريا من فلوس الضمان الوظيفي الي أصلا كان يستقطعوها من راتبك. يعني يجمعولك وقت الشدة.. يظلون ينطوك لفترة من الوقت لحد ما تلقى شغل جديد.. هنا محد يموت من الجوع ولا ينذل وينهان...فديتها كندا! 

بكندا، الضرايب على الرواتب نوعين: ضرايب فيديرالية وضرايب المقاطعة وتتراوح نسبتها حسب الي يدخلك بالسنة. هنا يمشون ع المجموع السنوي مو الشهري. واغلب الشركات توزع الرواتب مرتين بالشهر. هاي اذا كانت تستلم (راتب) سنوي. اما الي يستملون (اجر يومي) فاصحاب العمل يوزعونه اما أسبوعيا او مرتين بالشهر او شهريا.. حسب. 

طبعا شغلة الراتب السنوي والاجر اليومي مالها علاقة بنوع وظيفتك، ممكن تكون مستشار قانوني وتاخذ اجر يومي حسب عدد ساعات العمل وممكن تكون موظف بنك وتاخذ راتب سنوي. الاثنين الهن حسبة مختلفة من ناحية الاستقطاع الضريبي... وهاي يم الدولة. 

الفرق بين كندا وامريكا: أمريكا مو كل ولاياتها تأخذ ضريبة ع الراتب بينما كندا كل مقاطعاتها تأخذ. اكو ولايات ومقاطعات تاخذ شوي واكو تأخذ هواي، حسب نشاط المدينة التجاري والانتاجي ومدى اعتماد الدولة عليها. 

هامش: اكو نوع ثالث من الضرايب الي هو عن كل سلعة او خدمة تشتريها وهاي لوحدها بصراحة كسران ظهر بكندا، وهماتين تختلف من مقاطعة الى أخرى، مثلا تورونتو ضيف ع سعر أي سلعة او خدمة 13%، كيبيك 14% برتش كولومبيا 12% ، البرتا 5% وهكذا. 

صح نوبات ننزعج من شغلة الضرايب وشغلة انو لازم نشغل لحد اخر قطرة من طاقتنا، بس تره حقك راجعلك، محد يسرقه منك، الخدمات متوفرة سواء البنية التحتية، المواصلات، الكهرباء والمي، الصحة والامن...وحتى الترفيهية، هواي منها مجانيه. كندا تأخذ منك وتنطيك بطريقة مختلفة. 

يا ترى هلنظام صعب يتطبق بالبلدان العربية خاصة العراق؟ هم أصلا معبين بجيوبهم ملايين، ليش ميصرفون شوي منها ع الشعب، مو قصدي يطشون الفلوس بطيارة بالشارع، بس اشتغلوا شوي حللوا هلفلوس من نلعلعلعلعى. 

Share:

Read More

الفرق بين الصفر العربي والصفر الأجنبي – الكردت كارت والسكن

ايفان الدراجي

ملاحظة: العملة المستخدمة بالبوست هي الدولار الكندي 

ما ممكن نسمي بداياتنا بأوطاننا الام صفر، مهما كان كانت عائلتك او اقاربك او اصدقائك او حتى المعارف، الهم مساهمه بدراستك ووقوفهم جانبك معنويا وماديا. ولا ننسى شغلة المعارف خاصة والواسطات. 

اول شغلة كالوها الي من جيت لكندا، ابني شبكة معارف، قالولي: حتى لو سيرة العمل عندج خرافية وخبرتج 20 سنة وعندج 10 شهادات اذا ميعرفوج مراح تحصلين شغل. وهلشي مو بس ينطبق ع الشغل، حتى ع السكن والكردت كارت وحسابات البنك والقروض الدراسية وشراء السيارة واي شي. النظام هنا بكندا سلس من ناحية القروض الي ممكن الخصها بشغلات رئيسية ابتداء من الأقل للأعلى: الكردت كاردت وتبدي من $500 ، قرض السيارة ، لاين اوف كردت واكبر واهم شي قرض شراء البيت. طبعا استثنيت قروض البزنز لان ما عندي بيهن تجربه لحد هسه. 

** الكردت كارد يعني مبلغ يعرضه عليه البنك حتى تستخدمه ببطاقة بلاستيكية كـ دين، بس اذا ما سددت بموعدك، الفائدة كلش كبيرة ممكن توصل الى 22%. 

كل شخص لازم يكون عنده كردت كارت، ليش؟ لان بيها تاريخك المالي ومدى صحة وضعك المادي، الحكومة رح تبدي تعرفك من خلالها، البنوك وارباب العمل والبرنز وهواي مؤسسات، يقيمون الشخص حسب نقاط الكردت مالته، هواي موافقات ورفض وحجوز فنادق وووو كومة ما اكدر كلهن اعددهن يعتمدن ع هلشي. 

طبعا محد رح يشوفون معلوماتك بس تكون ع شكل نقاط. كلما نقاطك اعلى كلما الناس تعرف وتطمأن لان معناها الكردت مالتك قديمه وانو انت يدخلك راتب وشغلك مستمر وما عليك ديون ما ممكن تسددها. بشنو تفيدك هاي النقاط؟ ابسط شي من تروح تأجر بيت او شقة هنا وحسب قانون اونتاريو واعتقد هلشي فيديرالي بكل كندا وامريكا هم، العقد يبدي سنوي، ياخذون اول واخر شهر وتكتب شيكات بالايجار مال 10 الأشهر البقية من السنة مقدما بس يصرفوها بوقتها مو كلهن هسه يصرفوهن. واهم شغلة يجيكون عليها حتى يقبلوك هو نقاط الكردت مالتك. حتى يتاكدون انو انت ممكن تتحمل تكاليف الايجار لمدة سنة، وره السنة رح تصير شهر بشهر. اكو استثناء واحد وهو اذا دفعت ايجار السنة كلها ليكدام كاش. مثلا الايجار المتوسط حاليا بتورنتو لشي غرفة نوم وحدة هو $2500 يعني لازم تدفع كاش $30000 ثلاثين الف! 

قليل الي عدهم هاي الامكانية، زين شتسوي اذا انت جديد بالبلد وبعدك ما عندك نقاط والكردت جديدة؟ 

هذا اول صفر رح تواجه، اتخيل اذا تريد تاجر بيت بوطنك، رح تحتاج كل هذا؟ 

اكو حلول طبعا مثل الي احنا سويناها، تخلي كردت وانت تدفع للبنك فلوس حتى ينطيها الك لان مو كل البنوك رح تقبل تنطيك كردت كارت وانت جديد أي سجل ما عندك وياهم، فممكن تخلي $500 بالكارت وتستخدمها والي هيه أساسا فلوسك. تنتظر لازم كم شهر يلا تبدي تصير عندك نقاط. وتدور سكن مشترك كان يكون غرفة او قبو او بيوت بأماكن جدا جدا بعيدة عن المدينة ونادرا ما تتاجر، او... معارفك يدورولك شخص ممكن تشاركه السكن او تاجر منه وممكن يستثنيك من هاي الشروط بكفالتهم. 

نرجع نقارن ويه الوضع باوطانه من خلال النظر الها من نافذة تجربتي الشخصية، والي صارت بيه بكذا بلد عربي ومتأكدة صارت لاكثر من بنية خاصة اذا لوحدها، مراح يطلبون مني تقرير الكردت وشيكات، رح يعرفون شلون يأمنون الماديات وبنفس الوقت رح يتحرش بيه جنسيا لان يطمع بيه كبنيه مسافرة وعايشة لوحدها، وع فكرة اكو أصحاب أملاك هنا بكندا -من غباءهم- بعدهم يسوون هيجي ويه العربيات، واكثر من مرة تسحلهم الشرطة وتطيح حظهم. بس اذا الشغلة بالاسود مثل ما يسموها والي معناها مو قانونية ولا كتابة عقد ولا بطيخ، فالقانون هنا مراح يكدر يحميك. هلشي خلاني استنتج، معناها حياتنا بالبلدان العربية كلها بالاسود! 

هم صار البوست طويل لهذا رح اكمل باقي الاصفار ببوستات لاخ.

Share:

Read More

حياتك في الغربة، شلون تبدي من الصفر وشنو الفرق بين الصفر العربي والصفر الأجنبي

ايفان الدراجي

ما اشتاقيتولي؟ اني اشتاقيتلكم ... بس هاي الغربة مثل ميقولون، مو؟ 

خل نبدي اول شي نشرح شنو يعني غربة، ما أتصور اكو تعريف متفق اليه لان هو شعور ورح يختلف تعريفه من شخص لآخر 

ممكن تحس نفسك غريب وانت ابيت اهلك وبنص ناسك، وممكن تحس انك غريب عن الانسان الي مشاركك حياتك، بس بالنهاية احنا اتفقنا ع شي واحد، مو؟ الغربة يعني المحيط الي حواليك كأشياء وناس صارت بالنسبة الك مو مألوفة وجديدة وبعدك ما متعود عليها، لان مجرد ما تتعود ع أي وضع او شخص جديد يبطل يصير غريب. 

وحدة من الأسباب الأخرى الي خلتني ما اكتب هواي مثل قبل هو أصدقائي الأجانب، تعاي ترجمي كلشي تكتبيه او مراح يفهمون وهم يحبوني ويحبون يتفاعلون ويايه، مو كسلا بس شلون توصل الفكرة والاحساس بلغة ثانية؟ احسها نوبات ما توفيها حقها، وهم تستهلك وقت زايد مني. 

طبعا يمكن رح تضحكون، بس واني اكتب يمكن ميه مرة رجعت صححت لان نسيت أماكن الحروف بالكيبورد العربي! 

هل يا ترى تعودنا ع غربتنا؟ بصراحة ما اعرف.. احب البلد الي عايشة بيه واحب ناسه، احب مدينتي تورونتو كلش هوايه، و نوبات بالصدفة بالفيس من تطلعلي فيديوات عن العراق او بلدان عربية ثانية أخاف، أي أخاف، من يحجون عن قتل او حرب او تنطفي الكهرباء او ثورة او غيرها من احداث دتزيد خطورة من يوم طلعت، أخاف منها، وأقول ويه نفسي "مستحيل ارجع أعيش هناك لان مراح اقدر اتأقلم او اتحمل" .. مو انتقاصا من هاي البلدان ابدا، أتمنى يعم الخير والسلام ويعيشون عيشه مرتاحه، هلبدان تركت بيها اهلي واقاربي واصدقائي، تركت بيها ملعلميني ومعلماتي، تركت بيها اول حب وأول قصيدة وأول رسمه، تركت بيها ذكريات ومواقف هيه السبب بالي اني عليه اليوم، هيه الي خلتني قوية واعرف ادبر نفسي. 

احس عطشانه، واكو هواي بعد أمور ما اكتشفتها، بالناس الي عايشين هنا، بالاماكن نفسها بقوانينهم بهواي أمور، انو مازلت اتعلمها شي يسعدني لان هلشي معناها اني مرنة وداتأقلم. مو لان اريد اطلق نظرية تمشي ع الكل، بس برأيي هلشي ساعدني هنا "بالغربة"، اني امزج خليط كل الي تركته ويه الي داتعلمه هنا واخلق منه نظارات من خلالها احكم ع الأمور واتخذ قرارت بحياتي. 

ما اكذب عليكم، بالبداية كنت متصورة انو هلعالم مثل الجنة غلطة مابيه، بس هو مو هيجي.. كلشي اله سلبياته و اجابياته، ولازم بذكائك تتعرف شلون تستغل الفرص، ذكائك وشجاعتك، لانك اذا مو جريء من تتخذ أي خطوة ومستعد تخاطر، مراح تتقدم وتحصل الي تريده. 

البوست صار طويل، بغير واحد رح اكتبلكم شنو الفرق بين الصفر العربي والصفر الأجنبي. 

Share:

Read More