انا من المريخ




من كنت صغيرة كنت حاسة نفسي من المريخ وكنت احب اشوف كارتون (توتة في المريخ)!!
يعني معقولة اكو ناس بعدها تفكر بهذا الشكل ليومنا هذا؟؟ اذن خلوني اكول اني من المريخ احسن!!
شلون؟
تجيكم السالفة:
خبر وتعليق (ذئب يفترس فتاة في مدينة الناصرية).
علقت
احدهن: اي كالوا هاي امريكا جابتهن!!
اني صفنت! ورديت: يا امريكا؟؟؟ هاي بسبب التصحر والجفاف زحفت الحيوانات للقرى والمدن الصغيرة والقريبة من الاماكن الي كانت تتواجد بيها، يعني السبب يعود لقلة او انعدام الغذاء بالاماكن الي كانت بيها، تعرفين انتي السلسلة الغذائية وين ماكو مي اكو زرع يعني اكو مجترات يعني وجود حيوانات مفترسة وهكذا.
رجعت كالت: لا هاي امريكا لعد منين اجتنا هاي (الحياية = الافاعي) الكبار والقرطة والاقزام وهسه النوب ذيابة؟ احنا منين جان عدنا هيجي قبل؟ لو تماسيح؟ ليش العراق بيه تماسيح؟
اني ضحكت وطولت بالي ورديت: عيني اولا ماكو شي اسمه اقزام هاي كلاوات الجماعة مثل ماكلوا عن ذولاك الناس طلعوا من الحنفية!
اما عن هاي الحيوانات وهواي غيرها فموجودة من زمان بس بأماكنها البرية الطبيعية ما كانت تحتاج تزحف ، والي تقولين عنها قرطة هذا حيوان برمائي معروف!! انتي ما فد يوم شفتي قناة ديسكوفري او ناشينال جيوغرافيك حتى مخترعة ع القرطة؟ اكو اشكال الوان حيوانات غريبة عجيبة تره .
بعدين قبل ما كان اكو تغطية اعلامية مثل هسه بحيث اذا واحد عطس نعرف بيه قبل كلها تهوس للريس وضامة راسها حرف زايد ميحجون.
من باب ثاني اضافة للعوامل البيئية الطبيعية الي تتعلق بالغذاء اكو عوامل ثانية احنا البشر تسببنا بيها ودندمر كوكبنا ونقودة للتلوث والهلاك ببرودة تامة ولا مبالاة! يعني اغلب الاماكن الحدودية (البر) انتشرت بيها الغام ونفايات مال حروبنا الطويلة خصوصا الاخيرة بيها مواد مشعة يعني سكراب بين قوسين ناهيكِ عن تجفيف الاهوار وقطع بساتين النخيل وغيرها هاية بصفحة و(المهربجية) لمختلف الاغراض والعصابات لعبوا دور حقير ايضا بتدمير البيئة الطبيعية هناك وزارعي المخدرات ! وطرق دفن النفايات وتصريف المجاري وووووو...
بعد هذا الشرح المختصر طبعا رجعت تكلي: اي امريكا جابتهن ، هاي سوالفها!!
طبعا هنا عصبت وظليت اطفر: لج يا امريكا تردين تخبليني؟ ويامن احجي صارلي ساعة؟ عود انتي خريجة ودارسة وفاهمة!! امريكا شكبرها شعرضها محتاجة تجيب هيجي حيوانات للعراق حتى تأذي الناس؟ شنو ما اكو اسلحة بيولوجية الي هي الامراض وسمعتي عنها؟ ماكو طرق اخرى تخلي الاقتصاد بيدها مثل عقود التراخيص الشبه ابدية لشركات النفط العالمية لا بينا ولا بتاميمنا؟ لو هذول القنادر الي معكدتهم ع الكراسي شنو؟ ما ينام يم مرته اذا امريكا او عمامهم يوافقون؟ رجعي كولي امريكا جابتهم يله!!؟
Share:

No comments:

Popular Posts

Blog Archive

Featured Post

خمسة تفسيرات منطقية علمية لما يدعى بالمعجزات

  اعداد: ايفان الدراجي الخوف والجهل هو أساس ارجاء تفسير الظواهر الطبيعة آنذاك لقوى مجهولة خفية قد تكون من السماء يفسرها المؤمنون...

Recent Posts